Pananadem: Sempad a Maradika a Paninggalan sa Ranao

So MERA na papanok a makalelebi ko langowan na papanok sa donya ka langowan a dadabiatan niyan na ipekhahabayaon igira pepelimbay na gomagayad sa papak. Na izan niyan a dait ka maraparap peshaleg a pembinokor sa darem o mabinentay, karegan, kamaka endadawalinga so salegon a binaning, ago so kasomba morop ka magrag amantanas a salatang komarapar a romarek i tabiat o singkara pezalindao so menang ago daag o MERA ka dadayoan. Na igira phalad-lad na somasagomba lawi a izan no pephalimbay a kagoayan a bai ka iranon a inimbalod so rambayong ago gadong a lagid o bhoboyangen a salangkedao komedab. a izan no makabetho arap-parap a minggalao sa Awil-lawil a baning a bianay a mongkara a di tangkolo di kasar ka bhosog a sakoyogan ka pakarimbari saleg o masarempang ta milay ka paramata pizigi so MERA ka rawirian.

So peman so ME’ENAO na mala a totholan non. Na o sosoropa-ropen na phamosawiring kaden sa iphakapiya niyan na ba taman ni phagoway na di onot a kadarem ka masisimpan so niat sa ka totoratodaon sa kaphaka torogian. Na so totorogen peman na mapiyang ka paladan sa bhorawan datomanong na di niyan khatarima ka daa sino niyanon. Na oba pethataginep na ayang kaon pokaon so kamapiyaan niyan ka aniyan kanonawi. Na so peman so ME’ENAO o naino makalelebi ka phakailay, phakaneg, phakabao, phakataam taman sa phakagedam. Na mipenggolalan niyan so mapephamikirian a iphakapiya niyan. Na piaka zompat a dowa oto wa basa na MERANAO.

So Allah na malai gagao nago makalimoon. Inaden niyan angkai a ranao ka ped ko mga rarayag a tanda sa kaphaka gaga niyan. So mga ala a palao sa sebangan nai a alongan na ron madadalem so mga bolawan a pekhapoonan o mga ig a soti. Na miondas na so mga ala a lawasaig. Na miya ompong so ini ondas siran na kagiya matimo na giya ranao. Na limo o Allah a mini gonsi on a agos a lawasaig a mala na miondason so ig sa ranao na mini tapi ko ig ko mala a kalodan sa donya. Na giya agos na aya miyawid sangkaya a pito wa mga ala a kompanya a ni khabesaran a inged da Mindanao.

Na sabap ko limo o Allah na kiya tagoan sa tao so melilibeta sa ranao. Na so malo kiandakel o tao ron na bithowan niran sa mga ngaran so mga inged diran na pizakampong ngiran na piaka pat tiran ka phangampongan; sakampongon a Masiu, na sakampongon a Unayan, na sakampongon a Bayabao, na sakampongon a Baloi na aya kabethowaon na pat a phangampongan sa inged da ranao. Na aya miya gingedon na mga Meranao na so ngaran niran a Meranao na lagid o pamomolan a sii inarat sa ranao na mapiya anda siran zong na aya ipembetho kiran na Meranao. Na giangkanan a ngaran a Meranao na dowanan ka kalima a basa a palaya den mga pipiya a basa. Isaon ka kalima na MERA. Ikadowa a kalima na NAO. So MERA na daa lagidian a mapiyai paras a papanok sa donya. So NAO na mage’enao. Naso mage’enao na di niyan dii miphamoat so panamar ago so panagontaman. Na sabap ko limo o Allah na katii so osayan non.

Gintasan

So kasasarig ko Allah na phakada ko balamban o mga awida akal na khilaod so kamboko ko da a diden pimbarang. Na khada so karibabeng ago so kapaka rimeng, na khisambi so kalangas a kapipiya ginawa. So langowan o galebek a mga pipiya na aya bo a tharimaan non o Allah na sabo sa kapeniniatan non sa mapiya.

Na saden sa pephaka batiya sangkai na peniniati niyan sa mapiya ka embalasan non o Allah ka kadadaleman sa ongangen a obaden makaibarat ko pamomolan a makatho ko puso o pizakatawan; na sobo so bekao niyan na khasanaan a bolong ko mga awida akal, na so kayo niyan na khaapasan, na so sapakian na khalindongan, na so raon niyan na khasirongan, na so onga niyan na kharebasan sa mapiya a kapenggonaan niyan sa donya na sii pen sa kitalingoma o dalem mo isa a alongan. (more…)